Badamdar sürüşmə zonasında gərginlik: evlər sökülə bilər

“Paytaxtın bir sıra sürüşmə zonalarında aktivləşmə müşahidə edilir”.
Bunu Modern.az-ın sorğusuna cavab olaraq Ekologiya və Təbii Sərvətlər Nazirliyinin (ETSN) Milli Geoloji Kəşfiyyat Xidmətinin Geoloji planlama ekspedisiyasının rəisi Əziz Qaralov bildirib.
Ə.Qaralovun sözlərinə görə, xüsusilə Abşeron yarımadasında, “Nübar” qəsəbəsində, Zığ, Masazır, Zərgül deyilən ərazilərdə olan sürüşmə sahələrində nisbi gərginlik, yəni sürüşmə parametrlərində müəyyən artımlar qeydə alınıb:
“Badamdar sürüşmə sahəsində stabil gərginlik hökm sürür. Gələcəkdə baş verə biləcək sürüşmənin qarşısının alınması üçün hazırda ərazidə terras əmələgəlmə işləri aparılır.
Ərazidəki yol nəqliyyat vasitələri üçün açıqdır. Sürüşmə kütləsinin üzərində bərkitmə, terras əmələgəlmə işləri aparılır.
Sürüşmənin qaş hissəsində yerləşən 9 ev ki göstərmişdik, həmin evlərin həyətində ağır texnika işləyir, hasarları sökülüb. Evlər söküləcək yoxsa yox, bu barədə indidən fikir bildirə bilmərəm. Hazırda texnika ərazidədir. Yaxın günlərdə evlərin sökülüb-sökülməyəcəyini görəcəyik”.
Nazirlik rəsmisi qeyd edib ki, regionlardakı sürüşmə zonalarında ciddi dəyişikliklər yoxdur:
“Bakı-Şamaxı yolunun 108-ci kilometrliyində yol çəkilir. Orada müəyyən istinad divarları tikilir. Ərazi ümumilikdə sürüşməyə meylli ərazilər sırasındadır. Orada zaman-zaman sürşümələr baş verib. Bunun qarşısının alınması üçün yol tikinti idarəsi tərəfindən istinad divarları tikilib. Orada əmələ gələn çatlar əsasən intensiv yağışlarla əlaqdardır”.

  DİGƏR XƏBƏRLƏR